Інфаграфіка і візуалізацыя дадзеных

Навучэнцы пазнаёмяцца з паняццямі “журналістыка дадзеных” і “візуалізацыя дадзеных”, навучацца асноўным прынцыпам пошуку дадзеных, правільнай візуалізацыі колькасных і якасных дадзеных, нагляднай перадачы прычынна-выніковых сувязяў. Усё гэта дапаможа ў стварэнні добрай інфаграфікі, якая тлумачыць складаныя справы і адначасова прыносіць радасць і эстэтычнае задавальненне не толькі чытачу, але і стваральніку. Цягам курса навучэнцы пазнаёмяцца з многімі інструментамі, што дазваляюць, не будучы дызайнерам, ствараць інфаграфіку і візуалізацыі. Курс будзе карысны не толькі журналістам, блогерам, грамадскім актывістам, але і ўсім, хто цікавіцца новымі медыямі і збіраецца выкарыстоўваць іх для свайго прафесійнага росту і самаразвіцця. 

Прыкладная працягласць занятку: 2-2,5 гадзіны. Пасля кожнага занятку ўдзельнікі курса будуць атрымліваць хатнія заданні, што дапаможа лепш засвоіць змест навучання. Лепшыя з падрыхтаваных удзельнікамі навучальных матэрыялаў будуць змяшчацца на сайце “Твой стыль”, а таксама на блогу MediaStudio. У межах курса прадугледжаныя 2 аднадзённыя трэнінгі (у адзін з выходных дзён), кожны з якіх будзе цягнуцца 5-6 гадзін. На трэнінгах паглыбленна будуць вывучацца асобныя тэмы ў межах курса.

Прыкладная праграма курса  

Занятак 1: Уводзіны ў тэму. Візуалізацыя дадзеных і журналістыка дадзеных. Што спатрэбіцца нам і каму спатрэбімся мы? Ці камп'ютар можа зрабіць за нас усё і чаму не?

Занятак 2: Дзе і як знайсці дадзеныя? Як правяраць дадзеныя? Як у пошуку дадзеных могуць дапамагчы сацыяльныя сеткі?

Занятак 3: Прынцыпы добрай інфаграфікі і візуалізацыі. Добрыя і кепскія прыклады. Як зрабіць з кепскай інфаграфікі добрую. Чаго рабіць не варта.

Занятак 4: Пачнем з “простага” або інструменты Google.

Занятак 5-6: “Што?” або тое, на што людзі глядзяць. Фота, калажы, слайдшоў, інтэрактыўныя фотаздымкі, фотапанарамы, банеры, інтэрактыўнае відэа і іншае ў інтэрнэце. Куды загружаць, як апрацоўваць.

Занятак 7: “Дзе?” або праца з мапамі Geotagging, Geo-лакацыя і іх выкарыстанне для поспеху сваёй справы: некалькі бізнэс- і медыяпрыкладаў. Мапы Google, OpenStreetMaps і іншыя. Спосабы выкарыстання.

Занятак 8: “Калі?” або як адлюстраваць час. “Лініі часу” і інструменты для іх стварэння на прыкладзе TimelineJS

Занятак 9-10: Інфаграфіка, ч.1

Прынцыпы стварэння, добрыя прыклады, памылкі. Дзе і ў каго вучыцца? Выкарыстанне ў журналістыцы, прэзентацыях, паўсядзённым жыцці.

Як самому стварыць інфаграфіку. Бясплатныя інструменты (і не зусім) для стварэння статычнай і інтэрактыўнай інфаграфікі. Інфаграфіка сваімі рукамі з нуля: што можа даць камбінацыя бясплатнага графічнага рэдактара, пошуку Google, магчымасцей Office і роўных спрактыкаваных рук.

Занятак 11: Трэнінг

.

Занятак 12: Трэнінг.

Вядучыя курса: Аляксей Шота - рэдактар сайта “Твой стыль”, Вітаўт Руднік - медыяэксперт.